1. Tangiang na hohom
2. Marende BE. No. 597b : 1 – 2 “Baritahon di Dolok”
Ref. Baritahon di dolok di rura di sude inganan,
baritahon di dolok naung tubu Kristus i.
Di na lulululu au, arian borngin i,
rade do Ho Tuhanku, patudu dalan i.
Ref. Baritahon di dolok …
Di na pinabangkitMu au gabe naposoM,
patau ma au Tuhanku marhobas dijoloM.
Ref. Baritahon di dolok …
3. Votum~Introitus~Tangiang
U : Tasomba ma Debata Ama, mula ni nasa na adong, mula ni dungdang, mula ni Tondi, mula ni eme na marlundu, mula ni jolma na sungsang. I ma Debata Ama, mula ni nasa na asong, na hos di ari, na juang di langit. Na manatap sian ginjang ni langit, na manonggor tu toru ni langit. Mula ni hatuaon, i ma Jahowa Debata Ama.
H : Husomba jala hupuji hami ma goarMu, Ale Tuhan. Hasangapon ma di Ho, Amen.
U : Tasomba ma AnakNa Jesus Kristus, mula ni na lenggam, mula ni na denggan. I ma Jesus Kristus na gabe mual hangoluan, silumallan na tio. Na manarehon pangurupion, tu jolma na tading di ruruson, na mian di rura rurus. Mula ni jagar mula ni uhum, sipatiar na rundut, sipatio na litok, i ma anak ni Debata, Tuhan Jesus Kristus.
H : Husomba jala hupuji hami ma goarMu, Ale Tuhan. Hasangapon ma di Ho, Amen.
U : Tasomba ma Tondi Parbadia. Tondi pangurupi, Tondi pangajari. Tondi na basa, Tondi na bisuk. Na so matangkang dihata, na so matahut dibohi. Na songon bulu di holbung na so haliapliapan, songon hapur di tangan na so halipurpuron. I ma Tondi Parbadia na mian ditonga ni huria.
H : Husomba jala hupuji hami ma goarMu, Ale Tuhan. Hasangapon ma di Ho, Amen.
U : Naung dapotan hangoluan na salelenglelengna do angka na manghaporseai Ibana, jala dao do rimas ni Debata di sude angka na mangulahon hataNa.
H : Songon angka na manghaporseai Debata hita, taulahon ma sude siulaon, nang di hata, manang dipambahenan marhitehite goar ni Tuhan Jesus Kristus, huhut mandok mauliate tu Debata Ama marhitehite Ibana.
U : Asa ndada be angka paisolat manang panginsua hamu; angka dongan saharajaon, raphon angka na badia do, jala dongan sabagas ni Debata.
H : Ai sada do Tuhan, sada do haporseaon, sada do Debata, Ama ni sasude, sigomgomi saluhut, sitorusi saluhut, jala siingani saluhut.
U : Antong pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, dibagasan Kristus. Haleluya!
H : Mangendehon Haleluya, Haleluya, Haleluya!
U : Martangiang ma hita!
Ale Amanami, Ama ni Jesus Kristus Tuhannami na tubu di huta Betlehem! Na hundul di habangsa ni habadiaonMu. Sitiop tungkot ni Harajaon, na jongjong di halang ulu. Ale Ulubalang na gogo, sai manatap manonggor ma Ho tu bangsonami gabe huria. Na padimundimun marhitehite asi ni roha, na manogunogu marhitehite lambas ni roha. Ale Debata na margogo Raja ni raja, jalo ma somba dohot doding ni dodingnami. Ai Ho do Debata na mambungka di bona, jala na manutup diujung, Ho do bona dohot ujung na, jalo ma tangiangnami, na husombahonhami marhite AnakMu Tuhan Jesus Kristus, Tuhannami. Amen.
4. Marende BE. No. 48 : 5, 7 “Ria ma hita sasude”
Dibahen i las situtu do rohangkon nuaeng,
Hujangkon Jesus i tutu, :,:ai sonang au dibaen:,:
Ringgas ma hita sasude mamuji Debata;
Gogo ma taendehon be :,:Amen, Haleluya:,:
5. Ngolu na marlaok dosa.
L1 : Dimulana i, denggan do sude. Ndang adong na hurang. Debata do na manompa hita tumiru rupaNa.
L2 : Landit porhot songoon gota ni hapea, hansit ngotngot naung sangap gabe marlea ; songon i do nang hita, nungga ditompa Debata hita tumiru rupaNa alai gabe marlea do hita ala sai ta datdati mangulahon angka dosa jala sega ma rupa ni Debata naung adong hian di hita.
H : Mangendehon BE. No. 182:1 “tu joloM o Debatangku” BL. 24
Tu joloM o Debatangku sai use do rohangkon. / Sai pasiat tangianghu dohot iluilungkon.
L3 : Ndang tarbahen be turak, ai nungga sor gok tagan, Ndang tarbahen be mulak, ai nungga sor sun mardalan. Nungga dibagasan dosa be hita ala naung tarlalap do hita diangka ulaon na jat, hinorhon ni i sega ma parrsaoran ni jolma tu Debata.
L4 : Tung mansai las do rohanta molo sangap ni roha soggop tu hita alai jotjotan do hita marlosok ni roha do hita mamuji Debata marhitehite parmingguon dinalaho marsaor dohot dongan sahaporseaon.
H : Mangendehon BE. No. 182:2 “tu joloM o Debatangku” BL. 24
Husolsoli do rohangku na gok dosa i tongtong. / Ai godang araringku na hubahen ambolong.
L5 : Saluhut na do hita mardosa maradophon Debata. Ndang adong be disi na lilis, ndang adong na longa, nunga sude i sirsir nunga sude i hona. Di pargoluan siapari sai tapangke do angka tingkitta mangulahon angka na jat jala tahaporseai do angka gogo ni portibion jala sai tarpodom do hita dihaportibion, molo sahit na renge gabe tatundalhon do Debata jala mangido hamamalum ni sahit sian angka ruparupa ni portibion.
L6 : Hamoraan, hagabeon dohot hasangapon i do na pinarsinta ni halak Batak, Toho tutu na mora do luhut halak batak ala tung mansai godang do
H : Mangendehon BE. No. 182:4 “tu joloM o Debatangku” BL. 24
6. Hasesaan ni dosa
(panortor ro ma tu jolo ni langgatan, sian pudi ni ruas sahat tu adopan ni uluan, huhut ma manortor sahat tu na manudung bohi marhite ulos na ditiop na)
U : Hujou jala husomba hami ma Ho, ale Tuhan Debatanami. Debata ni ruhut, Debata ni uhum. Dibagasan dosa do hami tubu, jala magodang hami dibagasan hasalaan. Ale Tuhan Debata, mula ni asi, mula ni basa. Sesa ma dosanami, na jongjong di jolo ni langgatanMu. Na mangido songon galagala sitelluk, telluk mardaguldagul. Na sala na hutuhuk, nanget huapulapul. Asi ma rohaM.
H : Sesa ma dosanami. Asa ias ngolunami songon itak, jala bontar songon hapas.
U : Hujou jala husomba hami ma Ho, ale Tuhan Debatanami. Mula ni denggan, mula ni uli, asa denggan jala uli ngolu ni huriaM. Sesa ma dosanami, asa sombu uasnami sian aek hangoluan, na pinaradeM tu hami marhitehite sampuran ni holongMu. Marhitehite asi ni rohaM, sai tambortambori ma tano na limbi, jala sihorsihori bulu na manipi, asa mabaor sudena asi, jala por sude pasupasu na uli songon udan nene. Asi ma rohaM.
H : Sesa ma dosanami. Asa ias ngolunami songon itak, jala bontar songon hapas.
U : Hujou jala husomba hami ma Ho, ale Tuhan Debatanami. Tatap ma huriaM na tinorjo ni pordangMu, na nilonggi ni lilingMu. Sai sesa ma dosanami, asa salpu sude hasalaannami, songon parsalpu ni na holom, di na ro sibalik hunik. Sai paombun ma rimasmu, songon panorop ni ombun di buhabuha ijuk. Asa lambok huhilalahami, jala martumbur haporseaonnami. Ale Tuhan Debata, asi ma rohaM.
H : Sesa ma dosanami. Asa ias ngolunami songon itak, jala bontar songon hapas.
(Koor / musik mangendehon ende hasesaan ni dosa)
U : Songonon do hata ni Debata: “Buhaanna ma disi mata ni halak na mapitung, jala marbinege bahenonna pinggol ni angka na nengel. Dapotan hilas dohot las ni roha do nasida, maporus ma angka arsak dohot hoihoi. Ndang be male nasida, ndang be mauas, ndang be ditinggang las ni ari nasida. Jadi apusan ni Debata ma nasa iluilu sian mata nasida, ndang adong be hamatean nang arsak ni roha; nang anggukangguk, nang na hansit, ndang adong be disi, ai nunga salpu sudenai”.
(jongjong ma panortor, jala marembas ma di na laho mulak, songon tanda naung di sesa Debata saluhut dosa. Jala Koor / musik mangendehon ende pujipujian)
7. Marende BE. No. 595 : 1, 3 “Ai ise Posoposo on”
Ai ise posoposo i peak dipanggagatan?
Aha binaritahon ni suruan tu parmahan?
Kristus Tuhanta i, Raja na baru sorang i
Tasomba Tuhan i, Anak ni Debatanta
Na mora nang na pogos pe ro be ma tujoloNa
Taboan peleanta be tu Jesus i Rajanta
Marsuraksurak be mamuji Tuhan Debata
Marlas ni roha be marende tu Tuhanta.
8. Gabe daging Hata i (Barita Natal)
U : Didok angka parhapistaran sian Purba do, didia do Raja na imbaru tubu i? ai didok panurirang do: “ia ho huta Betlehem, apala tung na ummetmet ho ditongatonga ni angka huta na diluat
H : Marende BE. No. 608 : 1 “O Betlehem na metmet i”
O Betlehem na metmet i boasa modom ho,
Humirdophirdop bintang i hohom marnida ho.
Napinarsinta na sailaon sorang diborngin on.
U : Jadi adong ma marbornin diladang na disini, angka parmahan mangingani pinahan nasida. Jadi didapothon sada surusuruan ma nasida, jala marsinondang ma sangap ni Debata humaliang nasida, didok surusuruan i ma: “Unang mabiar hamu, ai naung tubu do dihamu saborngin on, dihuta ni si Daud, Sipalua i, ima Kristus Tuhan i”. Antong, dibagasan sadari on, taungkap ma rohanta, asa tubu Kristus, jala maringanan dibagasan rohanta.
H : Marende BE. No. 608 : 3 “O Betlehem na metmet i”
O Anak na badia i, ro Ho tu hami be
Bongoti daging tondi i, parbadiai sude.
Barita na ummuli, hutangi hami be
Sorang ma Ho dingolungki, Ale Immanuel.
9. Pagalak Lilin (Candle Light) ...... hohom ......
H : Marende BE. No. 54 : 2, 3 “Sonang ni bornginna i” jongjong
Denggan ni bornginna i, uju ro Jesus i!
Tuparmahan di Betlehem i, dipaboa na di Surgo i;
Nunga ro sipangolu, Jesus, Tuhanta i.
Godang ni tua disi di na ro Jesus i!
Tung malua pardosa muse, sian hamagoanna sude,
U : Nunga sahat Barita na uli tu tongatonganta. Nunga saor be panondang bolon dohot hita. Molo dilehon Debata tu hita sada silehonlehon na arga dibagasan ngolunta, ima Jesus Kristus Anak haholonganNa i, aha ma naung talehon songon sada pelean na arga tu Debata?
Borua : On ma alusnami, pataridahon ngolu songon sada huria hami, ima huria na mar-Koinonia, rap jongjong, rap hundul dohot dongan sahaporseaon. Asa tarida naung dipasada Debata hami dibagasan pandidion na badia.
U : Molo dilehon parhapistaran sian Purba, ima sere, haminjon dohot angka na angur, aha ma naung talehon tu Jesus Kristus na baru tubu i?
Baoa : On ma alusnami, pataridahon ngolu songon sada huria hami, ima huria na mar-Diakonia, mangurupi dongan na dibagasan sitaonon, asa unang be adong arsak ni roha, asa mariaia sude jolma dibagasan holong ni Debata.
U : Dina ro surusuruan mandapothon angka parmahan na adong disi, jala dibaritahon surusuruan i do naung tubu Jesus Kristus dihuta Betlehem, laho do nasida lao marsomba. Molo dibagasan sadari on sahat barita na uli tu tongatonganta, aha ma alusta di si?
H : On ma alusnami, songon parmahan na dihuta Betlehem, na ingkon lao do hami mamaritahon Barita na uli tu saluhut bangso, asa sude mananda Jesus Kristus do Raja na sinuru ni Debata Ama laho padengganhon hita tu Debata. Jala disima tarida songon sada huria hami, ima huria na marturia.
U : Antong, tapahohom ma satongkin, jala tarimangima padan naung tapasahat tu Debata. Pinuji ma Ho ale Debata, naung mangalehon silehonlehon na arga di hami, ima Jesus Kristus na gabe Raja dibagasan ngolu nami.
H : Amen!
10. Tangiang Pangondianon
11. Marende BE. No. 615 : 1 “Tarbege Sursuruan Marende”
Tarbege surusuruan, marende mansai uli
Angka dolok dohot rura, gok do saringarna i.
Sangap ma, sangap ma di Tuhan
Sangap ma, sangap ma di Tuhan
Las roham ale parmahan, nunga tubu Kristus i
Rap marende ma hamuna, pasangaphon Raja i
Sangap ma, sangap ma di Tuhan
Sangap ma, sangap ma di Tuhan
12. Jamita/Renungan
13. Marende BE. No. 52 : 1 – 3 “Hatuaon do” Pelean
Hatuaon do, las ni roha do, hatutubu ni Jesus i!
:,:Mago do jolma ro ma Tuhanta, las be, las be ma rohanta i:,:
Hatuaon do, las ni roha do, hatutubu ni Jesus i!
:,:Domu do hita tu Debatanta, las be, las be ma rohanta i:,:
Hatuaon do, las ni roha do, hatutubu ni Jesus i!
:,:Las ma rohanta mida Tuhanta, las be, las be ma rohanta i:,:
14. Pangauhonothon
U : Debata do na paborhathon hita tu sude ulaonta, ala ni i, unang mabiar hita, sai didongani Debata do hita dibagasan ngolunta, marhitehite Jesus Kristus naung tubu dibagasan rohanta.
H : Togutogu ma hami, asa tarbahen nami jongjong lao mangadopi pargulmiton ni ngolunami na marragam. Unang paloas ganggu rohanami, arahon hami tu adopanMu, asa unang mandao hami sian dalan hasintonganMu.
U : Ale Debata, Ho do pamuhai, jala Ho do paujunghonsa. Lehon hagogoon tu hami, asa unang tarlalap hami diparlalapan, asa rade rohanami manjanghon Ho manang sadihari pe Ho ro laho mangalap hami.
H : Hupasahat hami ma ngolu, daging nang tondinami tu Ho, asa unang marisuang hatutubu ni Anak haholonganMu. Lehon tu hami habisukon, asa margogo hami laho pararthon Barita na uli tu saluhut bangso, asa unang marisuang ngolunami.
U : Ale Tuhan, tangihon pangidoan nami, asa marhitehite i, lam marbungaran harajaonMu ditongatonga ni huriaM, songon i nang ditongatonga ni bangso nami.
H : Marende BE. No. 691 : 6 “Hupasahat ma tu Jesus”
Mauliate ma rohangku, ala au hinonghopMi,
Pujionku ma goarMu, Salelenglelengna i.
Hupasahat ma tu Jesus, saluhutna diringki
Hupasahat ma tu Jesus, saluhutna ngolungki.
15. Tangiang Pelean, Tangiang Ale Amanami