Ibadah Natal 2 (Bhs. Batak)

08.31 / /

PERAYAAN NATAL

Thema:
Naung dapotan hangoluan na salelenglelengna do na manghaporseai Anak i,
Alai na so mangoloi Anak i, ndang idaon ni i hangoluan;
sai na mian do tahe rimas ni Debata di ibana.

(Johannes 3 : 36)

1. Tangiang na hohom

2. Pamuhai

U : Nunga jumpang ari pesta, ima ari hatutubu ni Tuhanta Jesus Kristus. Tama situtu hita mamuji Debata, ai nunga patar dihita holong ni rohaNa. Gabe jolma do Ibana dibagasan sadari on. Sangap, sangap ma di Jahowa. Antong ale dongan, taparade jala tapaserep rohanta laho mamuji Ibana.

H : Pujionku ma Jahowa sian nasa rohangku, pajojoronku ma sude halongangan angka na binahenNa.

U : Puji hamu ma Jahowa, baritahon hamu ma GoarNa i, pabotohon hamu ditongatonga ni angka bangso, angka pambahenanNa i!

H : Pujionku ma Jahowa sian nasa rohangku, pajojoronku ma sude halongangan angka na binahenNa.

U : Endehon hamu ma Ibana, palu hamu ma parhinaloan umpuji Ibana. Sude hamu, ale angka bangso. Marende ma hamu sude angka houm, puji ma Jahowa, pasangap ma goarNa.

H : Marende BE. No. 597b : 1 – 2 “Baritahon di Dolok”

3. Votum~Introitus~Tangiang

U : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Naung dapotan hangoluan na salelenglelengna do angka na manghaporseai Ibana, jala dao do rimas ni Debata di sude angka na mangulahon hataNa.

H : Songon angka na manghaporseai Debata hita, taulahon ma sude siulaon, nang di hata, manang dipambahenan marhitehite goar ni Tuhan Jesus Kristus, huhut mandok mauliate tu Debata Ama marhitehite Ibana.

U : Asa ndada be angka paisolat manang panginsua hamu; angka dongan saharajaon, raphon angka na badia do, jala dongan sabagas ni Debata.

H : Ai sada do Tuhan, sada do haporseaon, sada do Debata, Ama ni sasude, sigomgomi saluhut, sitorusi saluhut, jala siingani saluhut.

U : Antong pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, dibagasan Kristus. Haleluya!

H : Marende BE. No. 624 “Haleluya, haleluya”

Haleluya, haleluya, nunga tubu Tuhanta i,

Haleluya, haleluya, puji GoarNa i.

U : Di Ibana ma hasangapon di tongatonga ni huria i jala dibagasan Kristus Jesus ro di saluhut sundut salelenglelengna! Haleluya!

H : Marende BE. No. 624 “Haleluya, haleluya”

Haleluya, haleluya, nunga tubu Tuhanta i,

Haleluya, haleluya, puji GoarNa i.

U : Martangiang ma hita! Ale Amanami, Ama ni Jesus Kristus Tuhannami na tubu di huta Betlehem! Sai pinuji ma goarMu na badia i, ala naung ditingkir Ho hami bangsoM. Ditogutogu Ho do hami sian haholomon tu hatiuron, jala dipadomu Ho do hami, na holang hian sian Ho, gabe saor muse tu Ho. Gok halalas ni roha do hami ala ni i, dina dijou Ho hami gabe manghaporseai Ho, asa dapotan hangoluan na salelenglelengna hami. Sai jalo ma hamauliateon ni rohanami, naung tinopotMu marhitehite AnakMu Tuhan Jesus Kristus. Amen.

4. Marende BE. No. 48 : 5, 7 “Ria ma hita sasude”

Dibahen i las situtu do rohangkon nuaeng,

Hujangkon Jesus i tutu, :,:ai sonang au dibaen:,:

Ringgas ma hita sasude mamuji Debata;

Gogo ma taendehon be :,:Amen, Haleluya:,:

5. Renungan Situasional

L1 : Dimulana i nunga adong Hata i, jala saor tu Debata do Hata i, jala Debata do Hata i. Ima na saor tu Debata dimulana i. Saluhutna i marhite sian Hata i do, umbahen na manjadi; jala ndang adong naggo sada sian naung jadi i, na so marhite sian Ibana.

L2 : Marhite Hata i do ditompa Debata sude nasa na asong di tano on. Jala denggan do sude ditomba Ibana. Ndang adong na hurang, ditongatonga ni saluhut. Ai dipataridahon angka jadijadianNa do hamuliaon na sian panompa bolon i.

L3 : Mataniari, bulan, bintang, ro disude angka hajanghajang mamaritahon sangap ni Debata. Boha do manisia? Dipuji ibana do na manompa ibana?

H : Marende KJ. No. “Dalam dunia Penuh Kerusuhan”

L4 : Parsaoran, i do na masa ditongatonga ni saluhut manisia. Marhitehite i do tatanda donganta sahaporseaon, marhite ido tatanda donganta na so saugamo, marhite ido tatanda na marragam do latar belakang, bangso, houm, karakter, kepentingan sahat ro di sude sifat na marasing.

L5 : Marhite i do dipatuduhon Debata asi ni rohaNa. Marhite i do dipangido Debata, asa masitungkoltungkolan hita saluhut dibagasan keberagaman. Jala marhite i do naeng dipatuduhon Debata, hinauli dohot hinadenggan ni jadijadianNa.

L6 : Sadari on, tabilangi jala tarimangi ma, aha do na masa dibagasan keberagaman i. Aha do na masa dibagasan hubungan manisia dohot donganna manisia, hubungan manisia dohot alam, hubungan manisia dohot sude angka na manggulmit ditongatonga ni portibion.

H : Marende KJ. No. “Dalam dunia Penuh Kerusuhan”

Patuduhon holong ni rohanta, tu saluhut dongan manisia.

Ro ma Ho, Tuhan Debata. Dibagasan Kristus husombahon,

Pangidoan saluhut ruasMu. Ro ma Ho, Tuhan Debata.

Ro ma Ho, ro ma Ho, Ro ma Ho, Tuhan Debata.

6. Bagabaga haluan sian dosa

U : Ndang pasombuon ni Debata hita dihaholomon, ndang pasombuon ni Debata hita dibagasan hagaleon, iluilu nang arsak ni roha. Beha do bagabaga ni Debata naung sinuriranghon ni angka panurirang taringot tu padan hadameonNa tu hita jolma?

H : Ro ma Ho ale Tuhan, palua hami on, asi ma rohaM.

N-Pa. : Hehe ma ho marsinondang ma ho! Ai na ro ma panondangmu, jala hamuliaon ni Jahowa binsar diatasmu. Ai ida ma haholomon do manghungkupi tano on, jala hagolapon angka bangso; alai na binsar ne ma Jahowa diatasmu, jala marsinondang hamuliaonna diatasmu.

H : Ro ma Ho ale Tuhan, palua hami on, asi ma rohaM.

R-Pi. : Songgop do tu ahu tondi ni Tuhan Jahowa ala naung nimiahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, manintinghon haluaon tu halak na tarhurung dohot tu halak na tarrante buha ni hurungan.

H : Ro ma Ho ale Tuhan, palua hami on, asi ma rohaM.

R-Pa. : Buhaanna ma disi mata ni halak na mapitung, jala marbinege bahenonna pinggol ni angka na nengel. Dapotan hilas dohot las ni roha do nasida, maporus ma angka arsak dohot hoihoi. Ndang be male nasida, ndang be mauas, ndang be ditinggang las ni ari nasida. Jadi apusan ni Debata ma nasa iluilu sian mata nasida, ndang adong be hamatean nang arsak ni roha; nang anggukangguk, nang na hansit, ndang adong be disi, ai nunga salpu sudenai.

H : Ro ma Ho ale Tuhan, palua hami on, asi ma rohaM.

N-Pi. : Satakkarisap lelengna hutadingkon ho, alai papungupunguonku do ho muse marhitehite angka asi ni roha godang. Gompul dohot anak ni birubiru marsaroha manjampal, jala singa manggagat panabian songon lombu, jala ulok na manghangoluhon orbuk, ndang be manjahati manang mangago disandok dolokhu. Ida ma denggannai dohot sonangnai, molo tung pungu sahundulan angka na marhahamaranggi, songon nambur ni Hermon, na mabaor tu angka dolok Sion, ai di si do diparbaga Jahowa pasupasu, hangoluan sahat ro di salelenglelengna.

H : Ro ma Ho ale Tuhan, palua hami on, asi ma rohaM.

U : Antong tapuji ma Debata, naung mangalehon padanNa tu hita. Sadarion sahat ma Hata i tu tongatonganta.

H : Amen!

7. Marende BE. No. 595 : 1, 3 “Ai ise Posoposo on”

Ai ise posoposo i peak dipanggagatan?

Aha binaritahon ni suruan tu parmahan?

Kristus Tuhanta i, Raja na baru sorang i

Tasomba Tuhan i, Anak ni Debatanta

Na mora nang na pogos pe ro be ma tujoloNa

Taboan peleanta be tu Jesus i Rajanta

Marsuraksurak be mamuji Tuhan Debata

Marlas ni roha be marende tu Tuhanta.

8. Gabe daging Hata i (Barita Natal)

U : Didok angka parhapistaran sian Purba do, didia do Raja na imbaru tubu i? ai didok panurirang do: “ia ho huta Betlehem, apala tung na ummetmet ho ditongatonga ni angka huta na diluat Judea, ai ho do huta haroroan ni Raja i, na marmahan Israel bangsongki!” Dungi borhat ma angka parhapistaran sian Purba dung diida nasida bintangna ditano habinsaran.Borhat do nasida tu huta Betlehem laho marsomba tu Raja naimbaru tubu.

H : Marende BE. No. 608 : 1 “O Betlehem na metmet i”

O Betlehem na metmet i boasa modom ho,

Humirdophirdop bintang i hohom marnida ho.

Alai ro sian ho do panondang na tongtong

Napinarsinta na sailaon sorang diborngin on.

U : Jadi adong ma marbornin diladang na disini, angka parmahan mangingani pinahan nasida. Jadi didapothon sada surusuruan ma nasida, jala marsinondang ma sangap ni Debata humaliang nasida, didok surusuruan i ma: “Unang mabiar hamu, ai naung tubu do dihamu saborngin on, dihuta ni si Daud, Sipalua i, ima Kristus Tuhan i”. Antong, dibagasan sadari on, taungkap ma rohanta, asa tubu Kristus, jala maringanan dibagasan rohanta.

H : Marende BE. No. 608 : 3 “O Betlehem na metmet i”

O Anak na badia i, ro Ho tu hami be

Bongoti daging tondi i, parbadiai sude.

Barita na ummuli, hutangi hami be

Sorang ma Ho dingolungki, Ale Immanuel.

9. Pagalak Lilin (Candle Light) ...... hohom ......

H : Marende BE. No. 54 : 2, 3 “Sonang ni bornginna i” jongjong

Denggan ni bornginna i, uju ro Jesus i!

Tuparmahan di Betlehem i, dipaboa na di Surgo i;

Nunga ro sipangolu, Jesus, Tuhanta i.

Godang ni tua disi di na ro Jesus i!

Tung malua pardosa muse, sian hamagoanna sude,

Ala ro Sipangolu, Jesus, Tuhanta i!

U : Nunga sahat Barita na uli tu tongatonganta. Nunga saor be panondang bolon dohot hita. Molo dilehon Debata tu hita sada silehonlehon na arga dibagasan ngolunta, ima Jesus Kristus Anak haholonganNa i, aha ma naung talehon songon sada pelean na arga tu Debata?

Borua : On ma alusnami, pataridahon ngolu songon sada huria hami, ima huria na mar-Koinonia, rap jongjong, rap hundul dohot dongan sahaporseaon. Asa tarida naung dipasada Debata hami dibagasan pandidion na badia.

U : Molo dilehon parhapistaran sian Purba, ima sere, haminjon dohot angka na angur, aha ma naung talehon tu Jesus Kristus na baru tubu i?

Baoa : On ma alusnami, pataridahon ngolu songon sada huria hami, ima huria na mar-Diakonia, mangurupi dongan na dibagasan sitaonon, asa unang be adong arsak ni roha, asa mariaia sude jolma dibagasan holong ni Debata.

U : Dina ro surusuruan mandapothon angka parmahan na adong disi, jala dibaritahon surusuruan i do naung tubu Jesus Kristus dihuta Betlehem, laho do nasida lao marsomba. Molo dibagasan sadari on sahat barita na uli tu tongatonganta, aha ma alusta di si?

H : On ma alusnami, songon parmahan na dihuta Betlehem, na ingkon lao do hami mamaritahon Barita na uli tu saluhut bangso, asa sude mananda Jesus Kristus do Raja na sinuru ni Debata Ama laho padengganhon hita tu Debata. Jala disima tarida songon sada huria hami, ima huria na marturia.

U : Antong, tapahohom ma satongkin, jala tarimangima padan naung tapasahat tu Debata. Pinuji ma Ho ale Debata, naung mangalehon silehonlehon na arga di hami, ima Jesus Kristus na gabe Raja dibagasan ngolu nami.

H : Amen!

10. Tangiang Pangondianon

11. Marende BE. No. 615 : 1 “Tarbege Sursuruan Marende”

Tarbege surusuruan, marende mansai uli

Angka dolok dohot rura, gok do saringarna i.

Sangap ma, sangap ma di Tuhan

Sangap ma, sangap ma di Tuhan

Las roham ale parmahan, nunga tubu Kristus i

Rap marende ma hamuna, pasangaphon Raja i

Sangap ma, sangap ma di Tuhan

Sangap ma, sangap ma di Tuhan

12. Jamita/Renungan Natal

13. Marende BE. No. 52 : 1 – 3 “Hatuaon do” Pelean

Hatuaon do, las ni roha do, hatutubu ni Jesus i!

:,:Mago do jolma ro ma Tuhanta, las be, las be ma rohanta i:,:

Hatuaon do, las ni roha do, hatutubu ni Jesus i!

:,:Domu do hita tu Debatanta, las be, las be ma rohanta i:,:

Hatuaon do, las ni roha do, hatutubu ni Jesus i!

:,:Las ma rohanta mida Tuhanta, las be, las be ma rohanta i:,:

14. Pangauhonothon

U : Debata do na paborhathon hita tu sude ulaonta, ala ni i, unang mabiar hita, sai didongani Debata do hita dibagasan ngolunta, marhitehite Jesus Kristus naung tubu dibagasan rohanta.

H : Togutogu ma hami, asa tarbahen nami jongjong lao mangadopi pargulmiton ni ngolunami na marragam. Unang paloas ganggu rohanami, arahon hami tu adopanMu, asa unang mandao hami sian dalan hasintonganMu.

U : Ale Debata, Ho do pamuhai, jala Ho do paujunghonsa. Lehon hagogoon tu hami, asa unang tarlalap hami diparlalapan, asa rade rohanami manjanghon Ho manang sadihari pe Ho ro laho mangalap hami.

H : Hupasahat hami ma ngolu, daging nang tondinami tu Ho, asa unang marisuang hatutubu ni Anak haholonganMu. Lehon tu hami habisukon, asa margogo hami laho pararthon Barita na uli tu saluhut bangso, asa unang marisuang ngolunami.

U : Ale Tuhan, tangihon pangidoan nami, asa marhitehite i, lam marbungaran harajaonMu ditongatonga ni huriaM, songon i nang ditongatonga ni bangso nami.

H : Marende BE. No. 691 : 6 “Hupasahat ma tu Jesus”

Mauliate ma rohangku, ala au hinonghopMi,

Pujionku ma goarMu, Salelenglelengna i.

Hupasahat ma tu Jesus, saluhutna diringki

Hupasahat ma tu Jesus, saluhutna ngolungki.

15. Tangiang Pelean, Tangiang Ale Amanami

16. Pasupasu + Amen

Label: